被精神病漢虐打致盲狗 B 女 完成開腦手術 已清走頭骨碎片

日前，某寺廟近日有狗媽生咗兩隻狗 BB，知情人士表示，最近附近有一名精神病漢，經常到寺廟騷擾狗狗。「該精神病漢已經打死咗另一隻 BB，幾日前又捉咗剩下嘅 B 女虐待亂打。」

好心人救起 B 女，帶「愛回家」義工趕到現場支援。義工發現 B 女頭部受創，已經無法正常行走，放佢喺地上，佢不停原地轉圈，相信腦部受傷。義工帶走 B 女，約見獸醫檢查傷勢。B 女改名「牛牛」。

無辜嘅「牛牛」已經驗咗血，照咗 X 光。獸醫表示，「牛牛」頭骨被打裂，左眼檢查下發現無焦點，懷疑已經盲咗，亦有可能腦部受傷致盲。因為「牛牛」不斷自轉，偶爾抽筋，加上年紀實在太細，情況好危殆，建議轉去神經科照 MRI 磁力共振 / CT。義工及後帶咗「牛牛」去動保機構 NPV，交咗俾張醫生檢查處理。

日前，張醫生幫「牛牛」完成咗開腦手術，清走頭骨碎片。NPV 姑娘表示，「牛牛」好大食，令人欣喜。義工希望在此感謝每位捐助「牛牛」醫療開支嘅善心人，令六星期大嘅「牛牛」有奮鬥嘅機會，為生存而努力。 

大家如果想繼續支持「牛牛」嘅復康之路，可以幫忙預訂購買「2024 慈善週曆」：bit.ly/3FPmvSF

資料來源：fb @ Helena Chung