職訓局增多個高級文憑課程 包括寵物護理及保健！ 明放榜日將設200個諮詢攤位

【#寵物護理】聽日放榜喇！正如《公開試當真》入面許賢話：「公開試不能完全定義一個人。」大家唔洗太緊張！城城小編支持你！

再同鐘意寵物嘅你講個好消息 —— 職業訓練局 (職訓局) 今年新增多個高級文憑課程，涵蓋寵物護理及保健、遊戲為本學習、電腦及數據工程等不同領域，為考生提供更多元嘅選擇！

為咗方便考生諮詢，職訓局將喺聽日放榜日，喺全港各區中學設立超過200個諮詢攤位。透過現場諮詢，考生可以了解課程詳情並即時遞交報名表。一般只需15分鐘，就可以得知取錄結果。

而早前獲有條件取錄嘅申請人，如果成績符合要求，將獲得正式取錄。呢批考生需在聽日下午4時前登入平台接受學位！新申請人及無被「正式取錄」嘅申請人，則可於放榜當日至本月22日透過職訓局嘅「中六入學申請平台」遞交申請並查看結果。

資料來源：職訓局